Mis queridos hermanos y hermanas na Cristo, ta reuni kita esta noche na este velorio, gendeh lang para llora el perdida del diaton hermano, ...
Mis queridos hermanos y hermanas na Cristo, ta reuni kita esta noche na este velorio, gendeh lang para llora el perdida del diaton hermano, sino para recorda el su vida na presencia de Dios.
Tiene un cosa bien bonito que ta puede kita observa na naturaleza cada dia, y este amo el sol. Si pensa kita buenamente, el sol ta queda gayot bien grande y majestuoso na dos maga momento del dia: na su salida na amanecer, y na su pag-sumi na atardecer. Este simple observacion del sol ta refleja el realidad del diaton vida y el profundo mensaje del diaton maga lectura hoy, usando tres palabra que ta principia con la letra S: Sol, Silencio, y Suma.
El primero amo el Sol. Igual con el salida del sol, asina tambien cuando ta nace el un bata. Cuando ta llega un nuevo vida, todo kita alegre. Ta admira kita con el bata y ta habla maga grandes cosa: "Ay, que bonito! Seguro hay queda este un gran persona." Grande el atencion y alabanza que ta dale kita, igual como ta admira kita con el grande sol na amanecer. Todo es promesa y esperanza.
Pero despues, ta llega el segundo palabra: el Silencio. A medida que el persona ta crece y ta vivi el su vida, igual con el sol na medio dia que ta brilla bien fuerte, raras veces kita ta alza mirada para admira con este. A menudo, ta ignora lang kita con el sol, o ta queja pa kita cay bien caliente. Na diaton vida, este amo el tiempo del maga luchas diarias. Na diaton Primera Lectura hoy, si profeta Jeremias ya experiencia este silencio y soledad cuando ya oi le el maga murmuracion y amenaza de muerte. Na Evangelio, si Jesus mismo ya enfrenta el silencio del incomprension cuando el maga Judio quierre apedrea con el. Asina tambien el vida del diaton difunto. Durante el su maga años de vida, seguro ya pasa le maga dificultad, maga sacrificio na silencio para na su familia, y maga momento de dolor que gendeh le ya hace alarde. Na este tiempo del "silencio" o medio dia del vida, raras veces ta oi kita alabanza. Ta toma kita con el presencia del uno y el otro por sentado. Pero Dios, como ta canta kita na Salmo 18, siempre ta oi el diaton voz na medio del angustia. Dios ta mira el diaton maga sacrificio silencioso.
Y finalmente, ta llega el tercer palabra: el Suma. Cuando ta llega el momento de la muerte, igual con el pag-sumi del sol na atardecer, el persona ta parece de nuevo bien grande na diaton maga ojos. Esta noche, na este velorio, alli ta rompe el silencio. Ta hace kita el suma de todo el maga buen cosas que ya hace el persona. Na Evangelio, cuando el maga Judio quierre mata con Jesus, ya defende le el su vida diciendo: "Muchos obras buenos del Padre ya dale yo mira con ustedes." Jesus ta apunta na su maga buenas obras. Asina tambien, ahora ta recorda kita el maga buenas obras del diaton ser querido. Ta habla kita: "Buen persona gayot le," "Bien generoso." De repente, ta recorda kita todo el maga virtudes que baka ya ignora kita durante el su vida.
Hermanos y hermanas, el atardecer del vida del diaton difunto ya llega ya. Grande le ahora na diaton memoria. Y bonito que ta hace kita el suma de su maga buenas obras. Por eso, ta anima yo con todos ustedes esta noche: no deja que este velorio pasa sin añadi el de ustedes propio suma. Habla ustedes con el maga buen cosas acerca de nuestro difunto. Acerca con el familia y comparti el maga bonitos recuerdos, el maga pabor y el amor que ya dale le.
Y para con aton todo que vivo pa, hay deja kita que este momento queda como un leccion. No espera kita que ta sumi ya el sol para admira con su grandeza. Mientras vivo pa el diaton maga seres queridos, hay hace kita suma de su maga buenas obras todos los dias, gendeh lang na final. Hay confia kita con Dios, el diaton campeon fuerte, que ta cuida con aton desde el salida hasta el sumi del sol.
Que el Señor dale descanso eterno con el diaton hermano/hermana, y que su luz continua brilla na diaton maga corazones. Amen.
No comments