Mga igsoon, samtang gitapos nato kining unang semana sa Kuwaresma, ang pulong sa Dios nagpahinumdom kanato sa atong identidad. Diha sa Deute...
Mga igsoon, samtang gitapos nato kining unang semana sa Kuwaresma, ang pulong sa Dios nagpahinumdom kanato sa atong identidad. Diha sa Deuteronomio, nadungog nato ang mahitungod sa Sabutan. Ang Dios nakig-uban kanato ug niingon: "Kamo mamahimong Akong katawhan, ug Ako mamahimong inyong Dios." Kini usa ka seryoso nga saad. Sama sa usa ka kaminyoon, kini nga sabutan nagkinahanglan og pagkamatinud-anon. Kita dili lang basta mga sumusunod; kita mga pinili sa Dios. Ug isip Iyang mga pinili, gitawag kita sa pagtubag sa Iyang gugma sa tibuok natong kasingkasing, hunahuna, ug kusog.
Ang pamaagi aron mapabilin kini nga sabutan mao ang pagtuman sa Iyang mga Sugo. Apan sa Ebanghelyo karon, gi-upgrade ni Jesus ang atong pagsabot sa sugo sa Dios. "Higugmaa ang inyong mga kaaway ug pag-ampo alang sa mga naglutos kaninyo." Kini ang labing lisod nga sugo sa tanan. Sayon ra ang paghigugma sa mga tawo nga maayo kanato. Apan ang paghigugma sa tawo nga nakapasakit kanato, ang pag-ampo alang sa tawo nga nagdaot sa atong ngalan—kana ang tinuod nga timaan sa usa ka Kristiyano. Ang sugo ni Jesus wala gitumong aron kita mag-antos, kondili aron kita mahisama Kaniya nga nagpasaylo bisan sa mga naglansang Kaniya sa krus.
Pinaagi niini, kita mamahimong Sagrado o balaan. "Mamahimo kamo nga hingpit, sama nga ang inyong Langitnong Amahan hingpit." Ang pagka-sagrado wala magpasabut nga kita dili na makahimo og sayop, kondili nga kita nagtinguha sa pagpuyo diha sa grasya sa Dios matag adlaw. Kini ang tumong sa atong panaw niining Kuwaresma: ang pagkab-ot sa kahingpitan sa gugma. Hinaot nga sa matag adlaw, ang atong mga pulong ug buhat magpakita sa kabalaan sa Dios, aron ang kalibutan makakita nga kita tinuod nga Iyang katawhan. Amen.
No comments