"Mga igsoon, karong ikaduhang adlaw, taas kaayo ang atong Ebanghelyo. Daghang ngalan, gikan kang Abraham hangtod kang Hesus. Kini ang F...
"Mga igsoon, karong ikaduhang adlaw, taas kaayo ang atong Ebanghelyo. Daghang ngalan, gikan kang Abraham hangtod kang Hesus. Kini ang Family Tree ni Hesus. Atong pamalandongan ang tulo ka G: Gigikanan, Gubot, ug Grasya.
Una, Gigikanan. Importante dinhi sa atong kultura sa Basilan ang pamilya ug kaliwat. Kung kinsa ang imong amahan, kinsa ang imong lolo. Gipakita ni Hesus nga siya tawo usab—adunay pamilya, adunay kagahapon. Ang Dios wala niabot isip usa ka estranghero, niabot siya sulod sa usa ka pamilya. Gipahinumdoman kita nga ang atong pamilya, bisan pobre, balaan kana nga gasa.
Ikaduha, Gubot. Kung atong tan-awon ang listahan sa mga katigulangan ni Hesus, dili tanan santos. Naay mga makasasala, naay mga hari nga abusado, naay mga babaye nga adunay komplikadong kinabuhi sama ni Rahab ug asawa ni Urias. Unsay pasabot ani? Nga ang Dios molihok bisan sa gubot nga sitwasyon. Usahay, ang atong kinabuhi sa Tumahubong o Mangal gubot—naay problema sa peace and order, naay away sa yuta, naay krisis. Pero dili kini babag sa Dios.
Ikatulo, Grasya. Taliwala sa taas nga listahan ug sa mga gubot nga istorya, niabot si 'Hesus nga gitawag og Kristo.' Mao kini ang Grasya. Ang Dios makamao magtul-id sa hiwi nga linya. Bisan unsa pa kalisod ang inyong giagian karon, bisan unsa pa ka-komplikado ang inyong pamilya, ang grasya sa Dios anaa gihapon. Si Hesus natawo alang sa mga makasasala, dili lang alang sa mga perpekto.
Busa, ayaw ka-ulaw sa imong gigikanan. Dawata ang grasya sa Dios aron mahimong hapsay ang gubot natong kinabuhi."
No comments