"Karong adlawa, Sabado, gitutokan nato si Mama Mary. Ang Ebanghelyo mao ang 'Annunciation' o ang pagpahibalo nga siya mahimong ...
"Karong adlawa, Sabado, gitutokan nato si Mama Mary. Ang Ebanghelyo mao ang 'Annunciation' o ang pagpahibalo nga siya mahimong Inahan sa Dios. Ang tulo ka pulong: Dawat, Duyog, ug Dalan.
Una, Dawat. Dako kaayo nga responsibilidad ang gihatag kang Maria. Delikado kini kay pwede siya batohon sa mga tawo kung mahibaw-an nga mabdos siya nga walay bana. Pero unsa iyang ingon? 'Fiat'—matuman unta. Iyang gidawat. Kita, inig abot sa problema o tawag sa Dios, modawat ba ta dayon? O daghan pa tag rason? Ang pagdawat sa kabubut-on sa Dios mao ang sinugdanan sa kalinaw.
Ikaduha, Duyog. Ang Anghel miingon, 'Ang Ginoo anaa kanimo.' Ug ang Espiritu Santo moduyog o mokunsad kaniya. Wala pasagdi si Maria nga nag-inusara. Mga igsoon, sa atong kinabuhi dinhi sa Basilan, dili ta nag-inusara. Ang Dios nagaduyog kanato sa atong pagtrabaho, sa atong kaguol, ug sa atong kalipay. Dili Siya layo nga Dios; Siya ang Emmanuel, ang Dios nga uban kanato.
Ikatulo, Dalan. Tungod sa pagdawat ni Maria, naabli ang dalan sa kaluwasan. Si Maria nahimong pultahan aron makasulod ang Dios sa kalibutan. Kita usab, mahimo tang dalan sa grasya para sa uban. Kung magbinuotan ta, kung magtinabangay ta sa atong komunidad, nahimo tang dalan aron mabati sa uban ang gugma sa Dios.
Sama ni Maria, atong i-ampo: 'Ginoo, ania ako, andam modawat ug magpadala Kanimo.'"
No comments