"Maayong kadlawon sa inyong tanan, mga pinalanggang mga igsuon. Nia na kita sa unang adlaw sa atong Misa de Gallo. Ang kabugnaw sa hang...
"Maayong kadlawon sa inyong tanan, mga pinalanggang mga igsuon. Nia na kita sa unang adlaw sa atong Misa de Gallo. Ang kabugnaw sa hangin karong buntag susama sa pagbati nato og kahinam sa pag-abot sa Ginoo.
Ang atong Ebanghelyo karon (Mateo 21:28-32) naghisgot mahitungod sa duha ka anak. Ang usa niingon og 'Oo' pero wala nibuhat; ang usa niingon og 'Dili' pero nagbasol ug nituman ra gihapon. Aron masabtan nato kini, atong hinumdoman ang tulo ka pulong nga nagsugod sa Letter P: Panaad, Pagbasol, ug Pagbuhat.
Una, Panaad. Daghan kita og saad. Sa atong politika, sa atong pamilya, usahay bisan sa atong pagpananom og rubber o copra, magsaad ta nga 'ugma na lang.' Ang unang anak sa istorya dali ra kaayo nisaad, 'Oo Tay, moadto ko.' Pero kutob ra sa istorya. Sa atong kinabuhi dinhi sa Basilan, kabalo ta nga ang saad nga walay buhat, walay pulos. Dili makapakaon sa pamilya ang saad lang.
Ikaduha, Pagbasol. Ang ikaduhang anak niingon, 'Dili ko.' Tingali gikapoy siya o gitapulan. Pero, 'nagbasol' siya. He changed his mind. Naka-amgo siya nga sayop ang mobalibad sa amahan. Mga igsoon, dili ulahi ang tanan. Bisan pa og aduna kitay mga sayop sa una, o mga higayon nga nakulangan ta sa pagtagad sa atong silingan, ang Ginoo naghatag kanato og higayon nga magbasol ug mobalik Kaniya.
Ikatulo, Pagbuhat. Mao kini ang pinaka-importante. Ang pagtuo makita sa buhat. Ang tinuod nga anak sa Dios dili kadtong sige lang og simba pero dili makamao mopasaylo sa silingan. Ang tinuod nga nagpaabot sa Pasko mao kadtong nagbag-o sa kinabuhi ug nagpakita og maayong buhat—sa pag-atiman sa yuta, sa paghigugma sa pamilya, ug pagduso sa kalinaw dinhi sa atong lugar.
Karong adlawa, ayaw lang kutob sa 'Simbang.' Himoa nga ang inyong pagsimba mahimong 'Pagbuhat' sa kabubut-on sa Dios."
No comments