"Maayong Domingo sa inyong tanan! Karon, Ika-upat na nga Domingo sa Adbiyento. Ang atong Ebanghelyo nagpakita kang Maria nga nagdali-da...
"Maayong Domingo sa inyong tanan! Karon, Ika-upat na nga Domingo sa Adbiyento. Ang atong Ebanghelyo nagpakita kang Maria nga nagdali-dali og adto kang Elizabeth. Atong hinumdoman ang tulo ka L: Lakaw, Lukso, ug Langit.
Una, Lakaw. Si Maria, human makadawat sa balita nga siya ang Inahan sa Dios, wala nagpuyo lang sa balay aron magpahayahay. Siya milakaw og nagdali padulong sa kabukiran aron tabangan ang iyang ig-agaw nga si Elizabeth. Kini ang tinuod nga diwa sa Pasko—dili ang pagdawat og regalo, kung dili ang paglakaw aron moalagad. Ang atong pagtuo dili puyo-puyo lang; kinahanglan kini molihok. Aduna ba tay silingan dinhi sa Mangal nga nanginahanglan og tabang? Duola nato sila.
Ikaduha, Lukso. Pag-abot ni Maria, ang bata sa tiyan ni Elizabeth (si Juan) milukso sa kalipay. Ngano? Tungod kay duol na ang Ginoo. Ang presensya ni Hesus nagdala og kalipay. Ang atong presensya ba sa atong pamilya makapalukso sa ilang kasingkasing sa kalipay? O makapahadlok nila? Isip mga Kristiyano, dapat kita ang magdala og positibo nga kusog ug kalipay sa atong isigka-tawo.
Ikatulo, Langit. Si Elizabeth miingon, 'Bulahan ka nga mituo.' Ang panagtagbo ni Maria ug Elizabeth usa ka gamay nga hulagway sa langit—diin anaa ang pagtinabangay, kalipay, ug ang presensya sa Dios. Kung magkahiusa kita isip komunidad, kung magsinabtanay ang mga Kristiyano ug atong mga igsoon sa laing tinuohan dinhi sa Basilan, atong matilawan ang dyutay nga langit dinhi sa yuta.
Busa mga igsoon, karong semanaha, ayaw pagtinapulan. Lakaw ug dad-a si Hesus ngadto sa uban."
No comments